KALANDAR HIJRAR MUSULUNCI

Abin mamaki a wannan zamanin sai kaga an tambayi mutum yau nawa ga wata sai kawai kaji yace "yau 21 April 2010" da ka ce masa a'a na Musulunci kake nufi sai kaji yace "ban sani ba" wannan gaskiya abin kunya ne ga dukkan Musulmin da za'a tambaye shi kwanan watan turawa ya fadi amma ya kasa fadin na Hijrar Musulunci.

TARIHIN HIJRAR MUSULUNCI

Asalin faruwar Kalandar Hijrar Musulunci, abu ne mai fadi da dogon tarihi, amma dai ta samu asalinta ne lokacin Khalifancin Sayyadina Umar Bin Khaddab (A.S.) a sakamakon wani abu mai muhimmanci daya faru a cikin watan Sha'aban wanda Sahabbai suka yi kokarin tantance wane Sha'aban ne amma abin ya faskara. Wannan dalili ne yasa Sayyadina Umar (A.S.) ya tara Sahabbai inda ya nemi shawarar yadda za'a rika tantance tarihin faruwar al'amura a Musulunci.

Don haka shawara ta tsaya akan fara lissafin kalandar Musulunci daga lokacin da Manzon Allah (S.A.W.) yayi hijra daga Makkah zuwa Madinah, kuma aka sanya watan Muharram ya zama shine watan farko a cikin jerin watannin kalandar Musulunci (Hijrah).

WATANNIN HIJRAR MUSULUNCI

Shekarar Musulunci (Hijrah) tana da watanni goma sha biyu 12 wadannan watanni sune:-
(1) Muharram
(2) Safar
(3) Rabi'ul Awwal
(4) Rabi'ul Thani
(5) Jumada Ula
(6) Jumada Thani
(7) Rajab
(8) Sha'aban
(9) Ramadan
(10) Shawwal
(11) Zhul Qi'idah
(12) Zhul Hajj

WATANNI HUDU MASU ALFARMA

A cikin watanni Hijrar Musulunci guda 12 Allah Madaukakin Sarki ya kebance guda hudu masu Alfarma, sune:-
Muharram wata na (1)
Rajab wata na (7)
Zhul Qi'idah wata na (11)
Zhul Hajj wata na (12)

A KARSHE
Shawara ga dukkan Musulmi ya dage ya ke sa kwanan watan Hijrar Musulunci a dukkan harkokimu na yau da kullum.
Allah ya daukaka Addinin Musulunci da Musulmai, Ya kare mu daga sharrin makiya Manzon Allah (S.A.W) ameen.